Bila Maombi Mengi Utaangaika sana Duniani

Namuomba Mungu kwamba kila aliyeokoka au aliyeingia kanisani kwa kusudi la kumtafuta Mungu aweze kusoma kitabu hiki. Lakini Pia namuomba Mungu kitabu hiki kisomwe na wahubiri wote wanaohubiri kwa ajili ya maslahi ya Mungu na hata wakitumie kuwaimarishia watu wao. Kwani watu wao/wa Mungu wakifahamu jinsi ya kuwa na maombi mengi, watapata ufunguo wa kila kufuli, komeo, kitasa au pingu iliyofunga maisha yao kwa namna yoyote. Lakini pia ni maombi yangu kuliombea kanisa kote duniani ili watambue kuwa; kanisa lolote au mtu yeyote aliye na uwezo wa kutoa mapepo au kupona magonjwa kokote kunakotokana na maombezi, kama tu kanisa hilo au mtu huyo hana maombi mengi yaliyo zaidi ya haya yaliyopendekezwa katika kitabu hiki; Basi KINACHOFANYIKA HAPO NI MAZINGAOMBWE NA VIINI MACHO. Na ili uthibitishe kuwa ni viini macho, basi watu wote wanaoombewa hapo hurudiwa na mateso yale yale na hata zaidi ya yale na huwa WANAKUWA NA MAISHA MACHAFU SANA (YA KALE) na huwa hawadumu siku nyingi katika wokovu. Lakini pia namuomba Mungu akujulishe na kukufunulia ukweli uliomo katika maombi mengi ambapo pasipo maombi mengi, mguso wowote unaokuwepo kwenye ibada, au kushangilia kokote kunakokuwepo wakati wa ibada au sherehe au kufaulu masomo, kupata kazi au faida kubwa katika biashara au kilimo, HAKUTAKUWA NA RAHA AU FURAHA ITAKAYODUMU. Ghafla utajikuta kwenye maumivu makali ya moyo, mwili au ufahamu bila kujua chanzo chake na huku ukiwa huna nguvu ya kuirudisha hali ya furaha uliyokuwa nayo hata kama vitu hivyo vitakuwepo au kuongezeka. Bwana na akupe kuyaelewa maneno yaliyoandikwa katika kitabu hiki na MUNGU NA AWE JUU YA MANENO HAYA, KATIKA JINA LA YESU KRISTO, AMENI.